Гистиоцитлар [гисто… ва юн. hytos – ҳужайра] – умуртқали ҳайвонлар ва одамлардаги бириктирувчи тўқима ҳужайраларининг бир хили. Тўп-тўп бўлиб ёки якка-якка жойлашади. Юмалоқ, бўлак-бўлак, дуксимон, кўпинча, узун ва ўсикли бўлади. Сохта оёқчалар ёрдамида ҳаракатланади. Эриган коллоид моддаларни организмнинг бошқа ҳужайраларига нисбатан кўпроқ ютиб, протоплазмасига тўплай олади. Фагоцитоз хусусиятига эга бўлгани учун организмда ҳимоя воситасини ўтайди.
