Гормонал препаратлар – таркибида гормонлар ёки уларнинг синтетик аналоглари бўлиб, гормонотерапия учун қўлланиладиган дорилар. Табиий гормонал препаратлар, асосан, сўйилган қорамолнинг ички секреция безларидан тайёрланади.
Гипофизнинг гормонал препаратлари [адренокортикотроп гормон (АКТГ). АКТГ-рух фосфат, хорион гонадотропини, пролактин, интермедин, питуитрин, адиурекрин, окситоцин, вазопрессин] гипофиз, буйрак усти безлари, жинсий бизлардан гормон чиқиши сусайганда, коллгеноз, аллергик касалликлар ва кузнинг баъзи касалликларида буюрилади. Қалқонсимон без гормонал препаратлар и-тиреоидин шу без етарли ишламаганда, организмни ёғ босганда, неврозда қўлланилади. Қалқонсимон без олди безларининг гормонал препаратлари – паратиреоидин тетания, спазмофилия, аллергик касалликларга даво қилишда буюрилади. Меъда ости безининг гормонал препаратлари – инсулин ва унинг препаратлари, шунингдек, синтетик препаратлар – бутамид, хлорпромазин қандли диабетга, липокаин эса жигар касалликлари, атеросклероз ва бошқа(лар) касалликларга даво бўлади.
Буйрак усти безлари пўстлоқ қаватининг гормонал препаратлари – кортизон, гидрокортизон, дезокскортикостерон, шунингдек, синтетик препаратлар – преднизолон, дексаметазон, синалар, кортизон билан гидрокортизоннинг аналоглари қуйидаги касалликларда қўлланилади. Масалан: ревматизм, инфекцион полиартрит, бронхиал астма, инфекцион мононуклеоз, нейродермит, экзема ва бошқа тери касалликлари, Аддисон касаллиги, буйрак усти безлари пўстлоқ каватида гормонларнинг етарли ишланиб чиқмаслиги, гемолитик анемия, гломерулонефрит, ўткир панкреатит ва шу каби касалликларни даволашда қўлланилади. Аёл жинсий гормонал препаратлари эстроген – фолликулин ёки эстрон, эстрадиолдипропонат, этилэстрадиол, синэстрол, диэтилстилбестрол, димэстрол, октэстрол, сигетин тухумдонлар фаолияти сусайганда ёки бутунлай гормон чиқармаганда, туғруқ дарди ва тўлғоқ яхши тутмаганда, аёлнинг кўкрагидан сут келмай қолганда, шунингдек, эркак простата безининг ракига даво қилишда буюрилади. Гестаген гормонал препаратлар – прогестерон,оксипрогестрон капронати, прегнин сариқ тананинг етарли ишламаслигига алоқадор касалликларни даволашда буюрилади. Эркаклар жинсий гормонларининг препаратлари – андрогенлар (тестостерон пропионати, метилтстостерон) эркак жинсий безлари тузук ишламаганда, эркак ва аёлларнинг климакс даврида, аёллар кўкрак бези ракини даволашда, томир ва нерв касалликларида, акромегалияда буюрилади.