Бифидобактериялар [лот. Bifidus-иккига бўлинган, айри ва бактериялар] – сут ачтувчи бактериялар тури, фойдали микроблар; бифидобактериялар спора ҳосил қилмайдиган граммусбат айри учли таёқчалар шаклида бўлиб, чиритувчи ва касаллик туширувчи микробларнинг ривожланишини тўхтатади, карбонсувларнинг ҳазм бўлишини таъминлайди, шунингдек, В, К, қисман С витаминлар ҳосил қилади. Бола кўкракдан ажратилган, бифидобактериялар ўрнига ичакнинг одатдаги микрофлораси пайдо бўлади. Унинг таркибида ҳам улар бўлади. Ичак дисбактериозини даволашда бифидобактериялар дори сифатида қўлланилади.
