Бош айланиши – мувозанат бузилиб, атрофдаги нарсаларнинг айланаётгандек сезилиши. Соғлом одам кескин ҳаракат қилганида, масалан, ўрнидан сакраб турганида, баландда юганида ҳам боши айланиши мумкин (физиологик бош айланиши). Ички қулокдаги мувозанат сақловчи аъзо (лабиринт), эшитув нервининг мувозанат сақловчи қисми (вестибуляр нерв), мия устундаги вестибуляр нерв ҳужайралари ва толалари ҳамда бош мия ярим шарлари чакка қисмининг шикастланиши бош айланишига сабаб бўлади (қ. Қулоқ). Вестибуляр аппарати ўта таъсирчан кишиларда бош айланиши кўпроқ кузатилади. Бундай кишилар болалик вактидаёқ транспортда юрганида, арғимчоқ учганида ўзини ёмон ҳис қилади. Вестибуляр аппаратининг бузилишига турли касалликлар (мия шикастланишлари, энцефалит, гипертония касаллиги, мия ўсмаси ва бошқа(лар)) сабаб бўлади. Шунингдек, ҳаяжонланиш, стресс ҳолати, ҳомиладорлик, заҳарланиш, ўрта ва ички қулоқ касалликлари оқибатида ҳам Б. а. кузатилади. Бош айланганда бемор кўнгли айниб қусади, қулоғи шанғиллайди, яхши эшитмайди, ўрнидан турганида аксари йиқилиб тушади, баъзан қисқа муддат ҳушдан кетади. Бош айланиши сабабини аниқлаб, даво қилинади.
[addtoany]
