Сульфаниламидлар – сульфанил кислотасининг кимёвий ҳосилалари, сульфаниламидларнинг (стрептоцид) антибактериал хоссасини биринчи бўлиб 1935 й. немис патологи ва микробиолог Г. Домагк аниқлаб, амалий тиббиётга киритди.
Қуйидаги гуруҳларга бўлинади: қисқа муддат таъсир этувчи С. – стрептоцид, носульфазол, этазол, сульфадемизин ва бошқа(лар); узоқ вақт таъсир этувчи С. – сульфодиметоксин, сульфопиридазин, сульфален ва бошқа(лар); маҳаллий қўлланиладиган С. – сульфален-натрий ва бошқа(лар)
Сульфаниламидларнинг таъсир механизми улар тузилишининг парааминобензой кислотасига (ПАЁК) ўхшашлиги билан боғлиқ. ПАЁК кўпгина Микроорганизмлар синтез қиладиган дигидрофол кислотаси таркибига киради. Кимёвий тузилишининг ўхшашлиги ҳисобига С. ПАБКни дигидрофол кислотаси таркибига киришига тўсқинлик қилади. Бундан ташқари, улар дгидроптероатсинтетаза ферментининг фаоллигини сусайтиради. Дигидрофол кислотаси синтезининг бузилиши, ундан тетрагидрофол кислотасининг ҳосил бўлишини камайтиради, натижада нуклеин кислоталарнинг синтези бузилади ва микроорганизмларнинг ўсиши ва кўпайиши тўхтайди, яъни С. бактериостатик таъсир кўрсатади. Одам ва ҳайвонлар тўқималарида бундай ҳолат юзага келмайди, чунки улар организмида тайёр дигидрофол кислотаси бўлади.
Сульфаниламидлар тиббиётда патоген Микроорганизмларга қарши восита сифатида қўлланади. Сульфаниламидлар меъдичак йўлидан яхши сўрилади, ҳамма тўқималарга тарқалади. Жигарда унинг метаболитлри ҳосил бўлади. Организмдан буйрак орқали чиқарилади.
Сульфаниламидларни бошқа антимикроб дори воситалари билан бирга қўллаш мумкин.
Сульфаниламидлар узоқ вақт қўлланса, уларга нисбатан микроорганизмларда чидамлилик юзага келади. Улар одам организмининг ҳар хил тизимларига ножўя таъсир кўрсатиши мумкин, шу билан бирга, уларга қарши аллергик реакциялар ҳам ривожланади. Шу боис С. ни фақат шифокор маслаҳати билан қўллаш лозим.
[addtoany]
